Бес салмақ дәрежесінде кәсіпқой бокстан әлемнің бұрынғы абсолютті чемпионы, жеңіліп көрмеген Флойд Мейвезер және Конор Макгрегор кездесуіне қатысты әркім әртүрлі пікір білдірген еді. Дегенмен, үздік кәсіпқой боксшылардың дені Флойдтың жеңетінін мәлімдеген болатын.
Алғашқы раундтарда Флойд бəсеңдік байқатты, бəлкім, жоспар солай болған. Өзіне тəн контршабуылы, айқын жылдамдығы да байқалмады. Керісінше, Конор қашықта ұстап, қауіпті апперкотымен ұстауға тырысты-ақ. Бірақ, онысы сəтсіз шықты. Осылайша, 4 раунд өте шығып, Конор жеңемін деген уақытында аяқтай алмады. Жəй сөз болып шықты…
9-раунд. Бұл раундтың аяғында-ақ Флойдтың нокаутпен аяқтайтыны байқалды. Себебі, Конор шаршап, бокстасуды айтпағанда, өз қолын өзі көтере алмағандай күйде еді. 10-раундты Флойд сəл бəсеңдете бастап, қайта жылдамдата жақын да орта қашықтағы хук, джеб соққыларымен төпелеп тастады. Конор болса, жауапсыз қалып жатты. Раундтың ортасына жетпей жатып, айқын түрде техникалық нокаутпен жеңілді! Осылайша, Флойд өзінің де, кәсіпқой бокстың да абыройын сақтап қалды. Кәсіпқой бокстағы бірінші кездесуін Конор жеңіліспен бастады, бәлкім, бұл соңғысы да болар… UFC бойынша әлем чемпионы Конордың өзі айналысатын спорт түрінің беделіне де белгілі бір деңгейде зияны тимеді деп санау қиын.
Дегенмен Флойдтан бұрынғыдай жылдамдық байқалмады. Екі жылдай уақыттан бері бокстаспағанынан да болар. Бəлкім, аса дайындалмаған əлде 40 жас өзінің әсерін анық берді… Мүмкін, Конорды ойнатты. Конор болса, “жаспын, ашпын”, 4 раундқа жетпей жеңемін десе де жеңе алмады. Есесіне, Флойдтың желкесінен бірнеше рет ұрып, бокс ережесін бұза берді.
Сонымен Флойд Мейвезер үздік боксшы екендігін тағы бір мəрте дәлелдеді. Кəсіпқойда 50 рет бокстасты. Оның 27-сін нокаутпен аяқтады. Еш жеңілмеді. Рокки Марчианоның рекордын бұзды!
Құрманғали Нұрғали
Фото korrespondent.net-тен алынды
ПІКІРЛЕР