Бүгін Ресей-Украина соғысына үш жыл. Кремльдің агрессиялық, отар ету бағытындағы соғысына украиндер әлі де қарсыласып келеді. Иә, осы уақыт ішінде Украина алапат оқиғаларды бастан кешірді. Сұмдық шығын тартуда. Ендігі екі тарап та зорығуға таяса керек. Өкінішке қарай, украиндер алдымен сыр берді…
Енді екі елдің жалпы шығынына біршама тоқталсақ…
Украина
Демографиялық дағдарыс қоюлана түсті. БҰҰ мәліметінше, соғыс басталған уақыттан бері украиндер саны 10 миллионға азайған.
Украина әлем бойынша босқыны көп елге айналды. Өткен жылдың аяғында босқындар саны 7 миллионды төңіректеген.
Соғыс салдарынан 40 мыңнан аса бейбіт тұрғындар қаза болған.
Қаза тапқан әскер санына қатысты ақпарат әртүрлі. Таяуда Д. Трамп 700 мың деді. Ал, В. Зеленский айтқан сан бұдан әлдеқайда аз: 46 мыңнан асады.
Экономикасы орасан зор шығынға ұшырады. Украина бюджеті шетелге өте тәуелді елге айналды. Ресей шабуылы кесірінен тартқан инфрақұрылым шығыны $170 миллиардты жуықтаған. Бұл Украина ЖІӨ-імен шамалас. 236 мыңнан аса үй қираған не зақым алған. 26 мың шақырымнан аса автожол бұзылған. Теміржолдың шығыны $4,3 миллиардқа жеткен. Ондаған миллиард АҚШ доллары көлемінде өнеркәсіп, ауыл шаруашылығы, құрылыс т.б. сала зиян шекті.
Өлім көрсеткіші өте жоғары елге айналды. Былтырғы жартыжылдықта 100 жаңа туған сәбиге 286 өлімнен келген.
Бүгінгі күні агрессор Украина жерінің 18%-ын бақылауға алған. Дегенмен үш жыл бұрынғыдан аз.
Ең қауіптісі, Украинаны Д. Трамп билігіндегі АҚШ тым тықсырып барады. Ресеймен әлдебір одақтасып, Кремльді агрессор деген айыптан арылтып, жәбірленуші елге айналдырса, Украинаға түсетін жүк тіпті ауырлайды. Десек те, империялық озбырлық саясаты емес, әділдік, теңдік жеңуі тиіс…
Ресей де соғыс ашып, үш жылда шекесі шылқып кеткен жоқ. Аталған ел империяны жаңғыртамын деп, экономикасын құлдыратты. Президенті Ресейді экономикасы ірі әлемнің бес еліне енгізуден дәмесі барын білдірген еді. Ендігі ондықта да жоқ. Үш жылда 900 мыңға жуық әскерінен айрылды. Мұндай шығынды Екінші дүниежүзілік соғыстан бері көрген емес. Онмыңдаған әскери техникасынан айрылды.
Бейбіт саясатқа ештеңе жетпейді…
Құрманғали Қалмахан
ПІКІРЛЕР